Entwicklig vo chundeschpezifische Lösige

Mir realisiere Informationssyschtem unger dr Verwändig vo relationale Datebanksyschtem wi bischpiuswis Oracle. Mir hei langjährigi Erfahrige mitem Datebank-unabhängige Entwickligswärchzüg Uniface.

Di vo üs entwicklete Lösige zeichne sech dür gröschti Flexibilität us u chöi mit dr Hiuf vo Parameter-Istellige i dr Regu schnäu uf nöii Bedürfnis apasst wärde. Eini vo üsne Lösige isch bischpiuswis sit viune Jahr i diverse Kantön im Isatz. Trotz ere identische Lösig setze d Kantön schtarch abwichendi Infraschtruktur i u betribe ungerschidlechi Schnittschteue zu angerne Syschtem.

Wartig

Mir betreue Applikatione usem Bereich vo de öffentleche Verwautige i Kantön u ir Bundesverwautig. Lösige, wo hochgradig uf ne Chund zuegschnitte si, wärde ungerhaute u bi Bedarf a nöii Aforderige apasst. Es isch üs es bsungers Alige, üsi Chunde o nach dr Ifüehrig vom ne Projekt witerhin z ungerstütze.

Situationsabhängig ungerstütze mir üsi Chunde vor Ort oder mit Hiuf vo Fernwartig (Remote Access).

Migration / Dateübernahm

D Team Spirit AG bietet Ungerschtützig u Beratig bi dr Migration oder Ablösig vo chundeschpezifische Lösige i nöie Umgäbige.

Insbesondere im Bereich vore Dateübernahm cha Team Spirit AG uf fundierti Erfahrige zrüggrife. Mir si i däm Bereich zuesätzlech ufe Ufgabebereich Verifikation vo übernonige Date spezialisiert (witgehend outomatisierti Prüefig vo grosse Datemängine innert churzer Zit).

Tescht-Management

Mir biete Ungerschtützig u Beratig bi dr Entwicklig u Dürefüehrig vo Teschts für Applikatione u Dateübernahme a. Üsi Erfahrige i däm Bereich basiere uf dr praktische Awändig bi üsne Eigeentwicklige u uf dr mehrjähriger Erfahrig i Beratigs- u Wartigs-Projekt.

Datebank Inschtallation u Administration (Oracle)

D Team Spirit AG verfüegt über langjährigi Erfahrig im Oracle Umfäud. Im Rahme vo üsne Projekt betröie u inschtalliere mer Oracle Datebanke i ungerschiedleche Versione u uf verschidene Plattforme (Windows, Unix, Linux).

Bi diverse Chunde hei mer d Datebank-Administration überno u i däm Zämehang uf ds Umfäud vom Chund zuegschnitteni Datebank Backup-Lösige entwicklet.

Beratig

D Team Spirit AG bietet genereu Ungerschtützig u Beratig vo A-Z im IT-Bereich a. Mir ungerschtütze d Chunde im gsamte Prozäss vor Ifüehrig, agfange bi dr Evaluations- und Offertphase, dr nötige Hard- und Software, bis hi zur effektive Inschtallation vor Ort u aufäuigi Betröiig im Betrieb. I Zämearbeit mit Partnerfirme si mer i dr Lag, spezieu uf Chlifirme zuegschnitteni Lösige, ischliesslech Netzwärch, Internet- u Mail-Abindig sowi Web- u Mail-Hosting ufdszeige.